Barraca ê zona menus favuresidu li na Boavista
CARTA DO BAIRRO DA BOA ESPERANÇA
“ Bom dia Onda Kriou, bon dia povu di Cabo Verde, N ta spera ma nhos sta tudu dretu y ma Deus ta prutejenu di es duensa mau.
E siginti :
A-mi ê moradora na bairro di Barraca, li na Boavista, y N podi fla ma 95% di pesoas ki ta odjadu na rua ta sai di kaza ê pamodi es ka ten otu opson. Barraca ê zona menus favuresidu li na Boavista, ê un bairro skesedu ki gosi sta na boka mundu so pamodi es duensa di coronavirus.
Li na Barraka kazas ka ten kuartu banhu : Ê pa nu bai “txada”
Li na Barraka kazas ka ten agu : Ê pa nu bai xafaris.
Li na Barraka ka ten luz 24 hora : Ê so di 5 hora tardi ti meia noti, mas nen ka tudu dia. Mi dja ten un mes ki N sta odja so luz di vela pamodi mutor straga y kes ki inda sta trabadja ka sta toma más ningen pamodi mutor sta sobrikaregadu.
Li na Barraca karu lixu ka ta txiga : Ê bo mé ki ten ki bai fulha.
Autoridadi poi lei ma agu ka podi lansadu na rua: E nos me ki ten ki bai lansa-l na txada.
QUATERNTENA OBRIGATÓRIO
Alguns morodoris li di Barraka prendedu es kinta-fera pamodi fladu ma es ka ruspeta ‘quarentena’, kuza ki nen N ka sabi si ê legal pamodi lei pa prendi nen ka izistiba . Di kualker forma kenha ki pegadu gosi ta anda na rua li na Boavista, mas partikularmenti li na Barraka, ta korri risku di lebadu prezu si es ka ten un justifikativu pa sta na rua ( so na kazu di nisisidadi sima es fla ). Ka fladu izatu izatu kuzé ki e “kazu di nisisidadi” , mas si pa kel la es ta entendi nisidadi di sai di kaza pa bai panha agu, pa bai kunpra alimentu ou pa bai fazi ‘nisisidadi fiziolojiku’ enton tud’algen ta sai pamodi li na Barraka ningen ka teni gelera xeio (maioria nen gelera ka ten y kes ki ten luz sta minguadu)
Di forma ki nu sta li ta pidi guvernu pa djobi pa nos.
Nu kré fazi quarentena sim, nu sta fazi tudu pa nu ka sai di kaza mas al-ves ka ten manera di nu ka sai, prinsipalmeniti hora ki nu odja nos mininu ta pasa fomi.
Nu sabi ma gosi ê ka hora di kulpa ningen mas si nu sta vivi es situason li na Barraca ê tanbi pamodi guverno nunka ka djobi pa nos. Si es ranjaba pur izenplu un forma ekunomiku di trasfiri Casa Para Todos pa moradoris di Barraca sertamenti nu ka sta pasaba pa es situason, mas es prifiri dexa kaza ta mofa enkuantu nos nu sta li , sen ninhun kondison di vivi.
Pa termina N ta pergunta kes djentis ki sta julganu sen sabi dretu kuzé ki sta pasa si es atxa ma nu sta sai na rua ku alegria na kurason ;
Si es atxa ma nu gosta di vivi nes situason.
Nhos ten nuson di medu ki sta dentu nos?
Nhos ten nuson di risku ki nu sta kori ?
Kenha ki nes mumentu di duzusperu ka kré fika na seguransa di si kaza, ku luz ku agu ku kumida ku sanita pa fazi nesisidadi ? Kenha ki ka krê pruteji si saudi y saudi di si fidju ?
Pur favor ka nhos julganu si nhos ka konxi rialidadi.
Muito obrigado
-MT , Barraca, Boavista. fonte;ok
COMMENTS