Mudjer, Razon di nós izistênsia

Mudjer, Di kel maior rikéza di naturéza

Mudjer 👸🏾
Detentora di tudu saber,
Razón di nós ser,

Midjor abrigu,
És ten puder di tra-u di kastigu y proteje-u di prigu,
Na és bu ta inkontra midjor onbru amigu,

Mudjer é serenata ki ta inkanta,
Pa ses fidju és é manta,
Na universu é midjor planta,

Pur instintu és é tudu gerera,
Pa és ka izisti barera,
És ten ki alkansa ses karera,

Mudjer👩🏾‍🦱
Razon di nós izistênsia,
Sinónimu di isênsia
y inosênsia,

Motivu di nós luta,
Di ses vida sufrimentu és ta okulta,
Sen és nada ka ta resulta,

Mudjer👵🏽
Meresedora di tudu nós Amor,
Símbulu di flor,
Pa és ka ta inporta tamanhu di Dor,
Di vitória És ten ki ta konxe sabor,

Mudjer👧🏽
Di kel maior rikéza di naturéza,
Sínbulu di nobréza,
Nós grandi morabéza,

Mudjer é perfeison mesmu ku tudu ses inperfeison,
Korason di tamanhu di mundu,
Razón pa ki nu ten próximos gerason,

Mudjer👶🏿
Korason nobri,
Alma abensuadu,
És pode até ser pobri,
Más senpri és ta alkansa risultadu,

Mudjer🧑🏾
Ser más brilianti ki diamanti,
Txeu d'es polivalenti,
És ten spritu pirsistenti,
Na és ta jera Simenti

Mudjer👩🏾‍🦱
Mesmu terrível és é Incrível,
Pa és nada ka é inpossível,
Donas di spritu sensível y afetu ineskesível,

Mudjer, pesa presiosa,
Pa instintu laburiosa,
Pa mérito vitoriosa,

Mundu ten un metadi mudjer,
Y kelotu metadi é tudu fidju di mudjer,

Mudjer! Ah mudjer! Nen tudu palavra di mundu ka é sufisienti pa diskreve-u!!

Autor: Jailson Borges
 Filis dia di mudjer pa tudu mudjer di universu! Nhos faze-n un favor, nhos seja pa senpri filis!👩🏾‍🦱❤️