Nu pruteji tudu nos idozu pamodi es ê ki sta kori mas prigu...

Pa es idozus, ki kuida di nos tudu ses vida, gosi e hora di nu ritribui.

Alô jovens
NU PRUTEJI NOS DJENTI GRANDI
Nu pruteji nos mai ku pai, nu pruteji nos donu ku dona, nu pruteji nos tiu ku tia, nu pruteji tudu nos idozu pamodi es ê ki sta kori mas prigu ku es nobu duensa ki sta na mundu. Coronavirus ka ta diskrima ningén, ê ta panha nobu ku bedju, mas na pesoas d’idadi ê ta fazi mutu más stragu, prinsipalmenti na kes ki ten prublema di saudi ,
Pa es idozus, ki kuida di nos tudu ses vida, gosi e hora di nu ritribui.

Ka nu abandonás nes mumentu di fronta.
Izolamentu ê pa tud’algen mas si kalhar pa jovens ê mutu mas fásil pamodi jovens ten otus meios di kumunika. Bedjus nau. Bedjus si ka dadu kel atenson es ta xinti abandonadu y kel la ê ka bon pa ses saudi... Si bu ten bedju na familia liga-l tudu dia si ê ten telefoni. Si ê mora pertu nada ka ta inpidiu di bai dal un bon dia ou un bo tardi desdi ki bu kunpri ku tudu regras di prevenson ( uza maskara si bu ten y da kel distansia ki regra ta manda)

KA NU DEXA NADA FALTÁ-S
Na zonas undi ki virus sta sirkula sen kontrolu sima na Praia ou na otu sidadis di mundu , kes nos djenti grandi ki ten prublema di saudi DI FORMA NINHUN ka podi dexadu sai na rua. Ê klaru ki es ta mesti ses ramedi, ê klaru ki es ta mesti kumida, ê klaru ki es ta mesti resebi ses penson mas ê pa kel li ki bo ki ê fidju, ki bo ki ê netu ou ki bo ki ê subrinhu bu ta ben sirbi. Pa djuda.

Si tudu jovens dentu di un familia organiza y fazi un lista di ses djentis grandi ki mesti ajuda sertamenti ninhun bedju ka ta fika di fóra. Autoridadis podi djuda sin, mas ê familia ki ten ki toma kósta, ê familia ki ten ki garanti ma djentis grandi sta ser prutejedu y ma nada ka sta faltás. Es ê ki tomaba konta di bó . Gosi ê bu vez di ritribui. Ê ka favor. Ê amor. Mas tanbe ê un obrigason fonte:ok