"Na nha vida toda, ndeseja tem um bonequinha preta pam brinca kuel"

Texto de Dicla Gonçalves...

Na nha vida toda, ndeseja tem um bonequinha preta pam brinca kuel. Kes poucos bonecas pretas k tinha era caríssimo e maioria des era "rapazes". Nta imagina rosto de fabricante na hora de fazel. Talves es ta flaba ma era mais facil um menino pmd assi é ka ta binha ku cabelo bedjo, ou então, es ta flaba kel k durante monte tempo nós africanas nu obi: "keli k maquilhagem k nu ta fazel? Kel pele li ka tem base pa el. Tudo ta fica feio".

Ka é atoa k pais sempre dá vida pa compra creme pa disfriza cabelo de ses fidjo. Ka é atoa k afro sempre foi conotado komo penteado irreverente e sinal de rebeldia.
Bonito sempre foi cabelo de meninas de novela. Corpo bonito sempre foi de meninas de revista e mudjer inteligente sempre foi kel k binha de países k ta falaba lingua diferente de di nós...

Pouco de nós nu percebe ma nu sa serba marionetes de colonizadores. Es sai de metrópoles mas es deixa raiz de colonizaçom filtrado na nós mente. Nu tinha k studaba mais, aprendeba mais sobre nós pa nu libertaba des.

Pouco de nós kre entra nes jogo duro k é descobre e protege nós identidade.

Mundo desenvolve mas erros continua kel mé. Kada bez es sta ganhanu so na kestom mais simples k a nivel de impacto tem um repercusom enorme. Es ta entra na bu casa, a partir de bu fidjo, es ta tornal racista, facista, preconceituoso e intolerante ku sis proximos pamodi bo bu deixa sr televisom ser pai de bus fidjos e bu deixa mama facebook educas.

Bu continua ta oferece bonecas de pele branca, sem inchinas ama kes menorias, ainda k caro de pele preto. Pamodi valor monetário sempre sobrepõe valor de ideias, de cria consciência...

Bu kre pes ser enginheiros e arquitetos mas bu atxa inutil inchinas storia de si proprio povo.

Bu continua ta faze basofaria na facebook ku kel k é ka de bo pmd a nivel de partilhas e gostos ta tem mais impacto...

Benvindo a mundo de falsidade k nu ta cria tudo dia. Enquanto nu ka descobre ma caminho pa cura sta na educaçom, sta na consciencializaçom e ta passa pa promoçom de nós identidade.

Tantos recursos gastos pa cura mal social, quando so é exigido de bo k bu seja presente como pai e mai, k bu seja resolvido enquanto ser humano e pertencente de um naçom e k bu ama sem medida...

#Bem vindo a Basofalândia. Mundo k tudo nós nu entra mas k alguns fica por opçom.