Nu valoriza nos mai, mai é grandi...

poema Fidjú ingratu

Fidjú ingratu

Fidju ingratu é bó,
Ki dispreza bu mai, pamodi el é pobri, kor mas skuru ki di bó,
Ki tem vergonha de alguém konxi bu mai pamodi bu tem um certu cargu,
Ki ka tá djuda na momentu de apertu,
Ki ka tem um tempinhu pá dá bu mai um oiii, um alou,
Pergunta mama mó ki bu manxi, djo kumé ou djo bebi.

Fika tá sabi,
Má desdi dia ki bu mai diskubri de bu existência,
Bu passa tá ser kel alguém mas importanti de si vida e si mundu,
Ka tá midi sforçu, pa ka dexou sinti falta de nada,
Tá dá si vida, pa de bó antis piska odju si for presizu,
El tá difendeu ku unhas e denti só pa ninguém ka mexi na si bem más presiozu.

Dentu si barriga,
El anda ku bó pa riba e pa baxu duranti novi mês,
Tá spera ansiosa pa kel dia mas importanti de si vida kê dia de bu nascimentu,
Más mesmu assim, bu ka tem um tempinhu pó visital, dal um abraçu,
Kela é u minimu ki bu debi fazi pa el,
Passa pertu de maternidadi bu sumara bu tá obi um poku de gritu e dor kê passa pel podi teneu na si braçu,
Tá anda dentu friu, bentu, djuba e sol na prokura um pon de cada dia pó ka passa pa difikuldadi.

Bu tristeza,
Tá poi si korason ta sangra,

Si maior filicidadi é odjou tá alkansa bus objetivus e konkretiza bus projetus,
Ko magua korason de kel alguém ki más tá amou desdi bu existência.

Ko spera,
Pá hora ki bu perdi bu bem más presiosu,
Pó bem rikunheci bus errus e txora rixu,
Pá tudu povu obi ou odja mó sta sufridu,
Si na momentu ki más el presiza bu ka stivi prisenti,
Ka mesti bem fazi homenagem na redis social,
Si na vida real bu ka tivi um tempinhu pó dal um karinhu especial kê merici.

Nu valoriza nos mai, mai é grandi.

Diclécio Jair de Pina
06/08/2020