Simentera

Sperança era nos maior arma

Hoje Felipe Miranda ta estreia na Dexam Sabi ku um poema sobre simentera...

"Mi é um jovem natural d  tarrafal (interior). Ta fazi licenciatura na engenharia civil... Ntem orgulho d undi kim bem ...y kuzas ki nkria nel, por isso nha cultura und kim bai nta lebal ku mih. Nka pod skeci nha kutelo, nha rubera"

SIMENTERA

Era 12 di julhu di 2012
Cantu n´rabida na mó
Era sugundu galu
N´xint kel ar puru d´azagua 
Dja tomam conta´l casa

N´corda sabina
N´Flal pe sumara um kusa
Na um sintonia
Nu ozerba kel txuba mansu na teia
N´odja alegria na rostu kel muiel
Ki na anus ki dja nu tem n´barasadu
Nka odjba inda

Sabina argui 
Sakedu riba batenti´l porta
Ta ozerba rótxa ta zingui la kelotu lém
Era nhu náxu ki ata distorceba n´xada na pó
diminga dja staba baxu si poiel ta ordia si limárias
Arnestina dja ka labantaba si miódus
Naaa Kel dia propi sima ki nos kutelu maxi mas faxi

Na kel uitimu galu
Dja nu staba tudu ta transia
Otu ta subi
Otu ta dixi
Otu la mé na bera
Tudu ta gardeci nhordez pa sustentu

Kantu sol ta ponta
Dja nu faseba um roda trabaiu
Renki ta bai
Renki ta bem
Rapasis ta paga pion
Moças nobu ta  n´tuia

Na kel ora la 
Sperança era nos maior arma
Tudu ta trabaia ku n´penhu
Pa oia nos kutelu ta produzi fartura

Dentu´l di oitora rapasis pid kebra djidjum
Moças nobu desmara troxa
Boita fila
Kantu ta da oitin´quartu
Rapasis labanta frakati
Ku fúria d´arguem ki kre trabaiu
onzi ora atxanu dja nu bua baxu

Boca tarde
kutelu n´teru rodiadu ta fasi tersu
oxi na casa flana
manham na casa bertilana
otramanham na casa sikilana
pa gardeci nhordez pa mas um dia

Ai kel tempu
Gosi nu ka podi rodia mas
Nhordez nhu danu paz na mundu