Desde minino n tinha um sonho k era de ser professora
um storia kontadu na pagina Dexam contau nha storia, pagina na facebook ki ta traze storia real kontadu em primera pessoas pa pessoas ki tevee superaon...
Olá boa noite minis, hoje nben li pan bem conta nha storia. Ami nha nome e Manuela nten 31 anos nta mora na palmarejo. Desde minino n tinha um sonho k era de ser professora, ami pikinote nta panhaba kaxote saco nta finjiba ma era alunos , nha kuadro e nha giz k era de carvon, nta daba aula tudu dia kkk. Dipos nben termina 12 ano. N resolve na bai studa la na unicv, n fala ku nha pai e flan " Manuela dexa atrevimento bu ka odja ma bu ka pode studa, ami nka sta na trabadju e nos nu ka ten como pagou kurso mi kubu mai kabu fronta alguem" minis pa incrivel k paresa kela k foi nha combustivel pan luta, dipos n fla papa pode dexa nta da nha spidente.
Minis n fika ta sai ta djobi trabadju dentu sol dentu txuba dentu frio, ate kin konsigui nha primero trabadju, nta ganhaba 5 kontu na kasa de alguem. Nkonsigui matrícula ku ajuda de nha avo (grata pa isso pa resto de nha vida). Dila nka desiste n bem sai de kel trabadju n atxa otu, ao todo n trabadja na 3 kasa de alguem. Nbata paga nha kurso. Mas na segundo ano n tive k kumpra computador m fika ku propinas atrasados, minis n poi papel na tudu lugar de Praia nka Konsigui bolsa. Dipos es bem mandan karta pan anula matricula, nka desiste, m fla sosi policia bem tran de dentu sala ntem k tra nha kurso kkkkk.
Nbata labuta ku vida sem ajuda de stado so de nha mae e nhas irmas mas grande. Tudu dia ta txora so desespero, dipos n ben pasa pa 3 ano de kurso , nkontinua ta bai, minis ami kuase pan desiste n fika ta manxi ta reza ta pidi deus ta manda karta pa tudu lugar bem parsen um luz na tunel n bem atxa bolsa na ministério solidariedade na ano 2009 e ao mesmo tempo ficase bem dan bolsa logo dipos inda pa ka kompleta n atxa trabadju na pt contact, nkaba pa renúncia nha bolsa de ficase. N fika so ku nha Trabadju e kelotu bolsa.
Nben termina nha licenciatura na 2011 nkaba pa entra otu trabadju kena na cvmovel ( txeu recordações bons e maus kkk) n tive la 6 anos. Nben consegui vaga na ministério 8 de setembro de 2018.Dja kuase 3 anos kimi e professora. Hehhehe resposta kin bem da nha pai " na finalista n flal papa bo k sta pon fita pamodi ami e trevida kkkk"
Minis keli e nha storia nka entra em detalis pmd sinon nkata ka skreve oji. Minis n sufri txeu, kumi pon k diabo masa monte bes, pasa mal ku falsindade de alguen k mas nta kunfiaba ( es e um monte) kkkk mas graças a deus n vence e hoje ami e feliz pa mudjer kin torna. Djan forma nha familia Nten um filha de 6 anos kin ta luta pa el tudu dia, nha rason de vive. Nta spera ma inspira nhos ku nha storia si nhos sta luta ka nhos desiste nhos poi fé a kel omi la di riba e alves soluson ta parse na hora k menos nuta spera. E nunka mas nunka ka nhos dexa ninguem poi nhos pa baxu e fla ma nhos kata konsigui.
Pamodi sibu kre buta konsigui SIM.
COMMENTS