Saúde é po paga, kumida si bu ka teni dinheru, lojas ka ta da-bu di grasa
N kre fika anonimo
Reflexão:
Nu sta kustumadu ta fla ma dinheru ka ta trazi filisidadi, justamenti na un mundu kapitalista ki nu teni!
Si fosi na un mundu undi si algen ka teni dinheru, hospital ta tratal di grasa, lojas ta oferese-l konpras di grasa, restóranti ta da-l kumida gratis, sé mori sé ka teni dinheru kaxon ta dada di grasa, nu pudia flaba ma dinheru ka ta trazi filisidadi nen pa rico nen pa pobri ki ka ten nada, ma kuzas é ka si.
Dinheru ka ta trazi filisidadi?
Sera verdadi?
Bon xan trazi nha pontu di vista! Bu podi ka konkorda, é normal, na vida nu ka podi agrada tudu algen ku nos opinion.
Tudu kuza ten 2 ladu. Ntendi li👇
Nes mundu kapitalista dinheru ka ta trazi filisidadi sin ma é pa ke-l milionário/rico solitáriu ki sta karegadu dólar ki ka sabi kuze ta fase ko-l ma ki sta xinti falta di afetu sinseru pur parti di entis keridu i pisoas ki ta rodea-l.
Pa un algen dizinpregadu ki ka teni nen 10ton fradu ki ta vivi na pobreza xtrema ki ka teni dinheru nen pa kunpra kumida, ki si oxi é kumi manhan é insertu, dinheru ta traze-l filisidadi sin, un 18 kontu na si mó gosi li é mutivu pe da pulu di alegria i agradesi Diós pa ke-l benson pamodi dje atxa di kunpra kumida di un mês interu pe poi na kaza.
Ainda bu sa atxa ma dinheru ka ta trazi filisidadi? Inda mas nes mundu kapitalista ki nu ata vivi ne-l undi nada é ka di grasa!
Saúde é po paga, kumida si bu ka teni dinheru, lojas ka ta da-bu di grasa, ti mori é po paga kaxon po podi interadu.
É ka so fla ma dinheru ka ta trazi filisidadi é splika na ki sirkunstansia é ka ta trazi filisidadi!
Dinheru ka ta trazi filisidadi- Keli é forma kes atxa di kontrola i fase un pobri sen nun tiston na bolsu xinti ma sen dinheru nes selva kapitalista mé ta vivi midjor sikre é pasa fomi ku nesesidadi. Pa ki nunka é rivolta pa situason di dizigualdadi ké ta vivi i pa ki kuzas nunka muda.
Nu abri odju, oras ki un milionário, un rico, un algen ben susedidu, ta abri boka ta fla ma dinheru ka traze-l filisidadi, é pamodi dje vivi ti ké ka vivi é ka teni nada mas di vivi dentu ganansia i li na bedjisa é ben rapendi pur kauza di solidon di ten tudu bens matrial i nada di afetu umanu.
Un algen ki ka teni di poi panela riba, ki fidjus sta tudu ku fomi, é ka ta xinti konfortavel na fla ma dinheru ka ta traze-l filisidadi, pmd é sa dipendi di kela pe podi subrivivi nes mundu kapitalista. É sabi ma sen nun tiston na bolsu, é ka podi ba pa lojas sendu ki la tudu é pa kunpra ku dinheru.
Dinheru ta trazi ganansia? Ta trazi sin, ma kela ta dipendi di kada algen, ten algen ki ka sabi kontenta ku 70 kontu pa mas ten kre mutu mas, ten algen ki ka ten nada ki un 20 kontu é txeu pa el i é sabi konforta ko-l.
COMMENTS