"Nvira prostituta sem nkre" - dezabafu di um kriola

Nunka nka pensaba sta nes vida,

Nu tevi um conversa ku um jovem ki sta na vida di prostituison, na conversa é ta mostra me ka tem txeu orgulho disso mas ma por agora é sta leba si vida si y ma um dia é ta kre sai. Nu ta bem relata u ke fla na primera pessoa, claro sem revela si nome, pamodi é ka danu es direito

Nunka nka pensaba sta nes vida, mas situason di vida lebam pa es kaminho, mi nta trabadjaba komu domestica ou diarista, nta limpaba na casa di pessoas, alves ta kuzinha. Sempre ndedica nisso, embora nka ta recebeba dreto y é ka tudu dia kin ta konseguiba trabadju ntinha fika fazi pa poi kumida na casa, teve um dia ki txiga di trabadja na casa di um homi ki muda nha rumu, des di primeru dia n odja ma é kria algu ku mi. Tevi um dia ke fla ma npodi ganha mutu mais ki kel ke sta dam pa dia, nfazi nka intendi, é kontinua ta insiste, ta kre pegan, nta rejeita. Tevi um dia ki nha fidju fika doente, y nstaba sem dinhero, pai di nha fidju nunka ka liga cuida di menino, tudu mi ki tem ki resolve, vida di mãe solteira k facil, perante tantos dificuldade, nkaba pa bai na proposta di nha patron, kaba pa envolve kol, y ke dia nsai di la ku dinhero ki nta ganhaba na 1 semana di trabadju, ku consencia um poku pesado, mas pa otu lado aliviado pamodi nta resolveba problema di paga consulta y exame pa cuida di nha fidju. Foi si kin kumesa ta envolve ku homes pa dinheru, es ta fla vida facil, mas pami nunka ka ta ser facil. é ka vida kin pensaba pa mi, mas situason tenem ainda nisso, ku speransa di um dia inviste na negocio y sai disso, pamodi nha fidju sa ta kria, y ntem ki dam orgulho di fla na kuze ki si mãe ta trabadja, y kel kin ta fazi hoje ka ta dal orgulho, nka ta kre nem pe sabi, Nka kre pa ninguem julgam erado.