Princezito - PENA N KA MUDJEL

Poesia de Princezito

PENA N KA MUDJEL

Si N era mudjel

Mundu ka era igual

Maridu nen di algudon

Fidju nen di golfinhu

Kumadri nen purfesora

Fidjadu nen ben kiriadu

Si mi era mudjer

N ka ta badjaba nen ku nha armun

N ka ta kasaba nen ku imigranti

N ka ta kunbarsaba nen rapasinhu

Ki fari...pa po-m mo li sin sin

Si mi era mudjer

N ta dá’ ku tornu so dentu fornu

N ta tomá’ banhu dentu tanboru

N ta lenbeba bexu rostu pa tras

N ta txupá dedu baxu’l sulada

N ta pintá boka kor di agu linpu

Si mi era mudjer

N ta andá so pa nbosgu

N ta kantá so dentu’l mi

N ta meteba grilu fereti

N ta detá’ na boka’l noti 

N ta argiba dentu’l nunku nunku

Si mi era mudjer

Tudu mes N ta saiba di kabesa

Tudu simana N ta mulá’ runhesa

N ta kapá’ katxas

N ta matá’ boi

N ta pizá’ bodi obu

Mi si N biraba mudjer 

N ka ta kudiba nun kasta d’omi

Nen ki txoma-m di Maria

N ka ta bá’ nun tipu’l festa 

Si kre matadu alifanti

N ka ta kanbá’ nun stilu’l badju 

Nen si Polinu Viera kanta Maria 

Mi si N era Mudjer

N ta mará’ pe ku san kaitanu

N ta mará’ duedju ku maranganha

N ta mará’ gana N tapa ku nganha

Si nha boka papiá’ na omi

N ta kebraba el ku po di pilon

Princezito

In: MANUAL DI MUDJER