"Otus povu kunpra bilieti entra Cabo Verde y nos nu ta aprizionadu na un burokrasia duentiu"

Na es momentu li nu sa ta sufri di un kolonizason undi ki e propi kabuverdianu ki e kolonizador.

Texto di Loyzitu :

Nu ka dexadu ser kabuverdianu inda. Mas nu tene un sonhu ma un dia nu ta ser kabuverdianu. Ten un forsa anti Kabu Verdi dentu-l nos téra. Kes pisoas es e ka e kabuverdianu, es sta li so pa guarda rikeza di antigus donus y interesi na es novu forma di kolonizason.

Na es momentu li nu sa ta sufri di un kolonizason undi ki e propi kabuverdianu ki e kolonizador.

Sen skreve mas txeu nu toma pa izenplu rialidadi di migrason na nos téra.

Kabu Verdi na kiston di integrason na grandis kumunidadi internasional sina lei di mobilidadi na CPLP. Nton komu nos téra e di turismu, nu ka ten txeu rikeza, nu dadu kel xansi di viaja mas faxi. Kuze ki kontise? 

Sistema kria un manera di toma-nu dinheru di forma duedu ku konplô di kes falsus kabuverdianu, ki sta li pa splora nos injenuidadi y kel spritu di falsu koitadu.

1.Imajina bu ten ki paga algen po bai trabadja pa el. Bu ten ki kunpra kontratu di trabadju(100/200 kontu);

2. Abo ku rizidensia ku kontratu di trabadju inda bu ten ki fase agendamento (100/200 kontu). Nos purgunta: pake agendason sendu bu tene kontratu trabadju y papel di rizidensia? .

Tudu kel sistema di imigrason na nos téra e anti-umanu y diaboliku. Otus povu kunpra bilieti entra y nos nu ta aprizionadu na un burokrasia duentiu.

Ka un ka dos ka tres, nu tene kantu algen ki dja perde munti dinheru ku golpistas ki sa ta splora ku papel falzu.

Stadu ka ten un strutura pa difende kabuverdianus. Na verdadi kes golpistas la e ka e kabuverdianu.

Mas tudu isu dja staba profetizadu. Sploraron interna pa un grupu di pisoas ki sustenta benda di nos indipendensia. Kuza ki nhos ten e koraju. Ta bende sonhu di un povu.

Gose e tenpu di revoluson mas revoluson Mental.

Stop splorason di kabuverdianu.