Beat africanu sta konquista Europa a-partir di Portugal, Brancos gossi sta badja ku Pretos

Inimaginável ha uns 15 anus atras, hoje funaná, kizomba y kuduru sta kantatu pa artistas y grupos portuguez y radios y televizon ka ta sobrivivi + sen es magia di beat africanu.

Beat africanu sta konquista Europa a-partir di Portugal

BRANCOS GOSSI STA BADJA KU PRETU...
Nen sempri ka foi si y ti inda ten na Portugal discotecas ki so pretu ki ta frequenta y distotecas ki so branco ki ta frequenta. Mas cuzas sta muda...Cuzas sta muda graças principalmenti a es novo gerason di cantores y DJ ki poku a poku sta coloca Afro-pop na paizagen muzical portuguez y europeu na geral.
Inimaginável ha uns 15 anus atras, hoje funaná, kizomba y kuduru sta kantatu pa artistas y grupos portuguez y radios y televizon ka ta sobrivivi + sen es magia di beat africanu.

Na primeru planu di es novo gerason di artistas africanos ki sta konquista Portugal sta cantores moda Alselmo Ralph y Nelson Freitas, ki també ta da konceros un poku pa tudu Europa, mas propri ki sta fazi revoluson ê es jovens Dj ( otus inda na idade di scola) ki sta sai di ghettos pa konkista Portugal. Es jovens, nascidu y kriadu na Damaia, Buraka ou Quinta do Mocho undi kaminhu pa futuro era trabadja na obra ou xinta fuma padjinha, es jovens Dj sta encontra na muzika un alternativa credivel pa futuro.

Tudu kumesa na 2000 ku sucesu di “Baraka Som Sistema” , un grupo ki naci na suburbio norte di Lisboa y ki rapidamenti konquista mundo ku ses mistura di techno, breakbeat y kuduru tradicional (Obi “Buraka”, ê ses ultimo albun ki sai na 2014).

Hoje en dia Nigga Fox (foto) ê talvez kel DJ africanu di + sucesu na Portugal, mas també nu ten Marfox, Firmeza, Lycox, Nigia Minaj, etc. Es ê ki sta fazi revoluson na clubes y discotecas ku muzikas kurtu y vibranti karregadu di cor y som di un continente ki forcozamenti es ka conxi . Es ê ki sta fazi mudansa, es e ki sta poi barnco ku preto ta badja djuntu.

Sucesso di es jovens DJ sta ultrapassa Portugal : na França y na Inglaterra txeu produtores sta pidi ses participason pa da koncertos, pa grava albun ....Ê ki beat africanu sta invadi Europa, brevimenti ê ta ocupa mesmu lugar ki muzika latina y grandes produtores certamenti ka kré perdi es oportunidade. fonte:ondakriolu