Bu sabi ma nu ten 2 fidju, por isso ê ten ki tra metadi vencimentu pa ê paga penson di fidju sima lei ta fla.
DONA FILÓ POI MARIDO NA RUA...
Quer dizer, ê ka pol na rua, so ê mandal di volta pa Jenny. Pa Jenny ê manda es mensagen através di facebook.
MENSAGEM DI DONA FILO PA JENNY
“Obrigado, Jenny, pa marcas ki bu dexa onti noti na piscoz di nha marido.
A sério, obrigado !!
Bu ka sabi fronta ki bu tran d’el, mi ku nha mininus. Pan kompensau pa es bu servisu N’ta dau nha marido di grasa. Fika k’ol. Mas N’ta dexau alguns konsedju:
BU TEN KI APOIAL KU DINHERU
Bu sabi ma nu ten 2 fidju, por isso ê ten ki tra metadi vencimentu pa ê paga penson di fidju sima lei ta fla. Y como na es ultimos 11 anu ê tratan sima kriada ê ten ki pagan també nha penson alimentar. Por isso squeci di si dinhero kerida Jenny, si dinhero ê di meu !!
BU TEN KI KUMPRAL ROPA
Ê ki es parmanhan kuandu N’discubri bus “marcas di amor” na si piscoz surgi di repenti dentu nos caza (gossi so di meu) surgi di repenti un grandi “buraco negro” ki enguli tudu si ropa. Di modos ki já-já ê ta txigau la na bu caza mó ta bana y quazi nu-priti ( bo ê sortiaaada!!) Bu sorti tambe ê ki bu podi bistil modi bu kré, bu podi até fazi alguns locuras y kumpral meia-duzia di calsinhas fio-dental ou un bistidinhu brilhanti pa bu pol dentu del. Ou emprestal di bó.
BU TEN KI DEXAL LIVRE FIN-DI-SEMANA...
Ê tempu ki ta ben estabelecedu pa ê vizita si fidjus. So fin-de-semana. Y como el propri ê admiti dianti di testemunhas ma bo ê un “doida variada” ki ê conxi na discoteca bu ka podi kumpanhal na vizitas pa bu ka trazi mau-influencia pa mininus. Y já agora, kuze ki ê bai fazi discoteca el ki nen badja ê ka sabi.?
BU VIDA SEXUAL KA TA SER FÁCIL...
Sin, N’sabi ma onti noti nhos ka tevi ninhun relason sexual, ê so marcas ki bu pol . Ê ki “máquina” ka sta funciona desdi ki ê sufri un xóki na kuluna dja ten uns 3 anu. Azar di bó pamodi antis nu ta fazeba sexo sabi ki sima kel ka tinha . Gossi nada.
Ê KA RETORNÁVEL
Ka bu mandan el di volta pamodi N’ka ta recebi. Kuandu ê embrudja ku bó ê kumeti un krimi imperdoável. Mi até N’foi un bon mudjer pa el, foi ku mi ki ê passa si midjor mumentus, por isso ka bu surprendi si un dia ê kumesa ta kulpau pamódi mi.
BU PODI BEN RAPENDI...
Sima djan flau ê ta ben kulpau pa tudu cuza. Ê flan, ku lágua na odju, ma bu flal ma bu ta spera ma N’ta odja kes “kiss mark” ki di prupózito bu pol na piscoz. N’ka sabi si bu flal ou nau mas també ka interessa, mas si bu flal bu deseju dja rializa. Di facto un odja marcas y na altura ê dexan furibunda. Ku joelho na txon ê pidin perdon mas na raiba un intxal odju, tudu 2, mi ki ê kontra violencia doméstica. Na verdade foi primeru bes k’in agridi alguén: N’dal ben dadu mas N’ka rapendi. N’ta tornaba daba el mas talvez en vez di tudu 2 N’ta intxaba el sô un odju pa ê podi odja dretu kaminho di bu caza.
KEL LI Ê KA UN AMIASA, Ê UN AVIZU...
Bu podi tomal sima bu kré, mas pa mi kel li ê só un avizu: A-partir di hoje nha passatempo favoritu ê fazi di nhos vida VIDA NEGRA. Bo k’ol.
N’ta garanti ma N’ta transforma nhos vida nun infernu. N’ta pirsigui y N’ta mágua nhos sima nhos pensa ma nhos ta maguan, ka bu mesti nen sai ku ben pidin disculpa pamodi un ka ta purdua, nen el nen bó, a-bó Jenny “doida variada” ki dexa marcas na piscoz di nha marido pa bu mostram ma 2 fidju y 12 anu di cazamentu ê ka obstáculo pa bó. A-bó Jenny dodu-baridu ki kré mostran ma mi ê ka rival pa bó. Koitada! Bu ganha bu homi ben ganhadu . N’ta dau palmu. Fika kol, ê so di bo.
BON PRUVEITO.” fonte:ondakriolu
Bu pode le resposta de Jenny li
COMMENTS