USA: Joven cabo-verdiano na Merka acuzadu di krime na morte di si midjor amigo

Unico passageru ki sta na carro, un joven di 21 ano, ê prujetadu pa meio di strada y atingidu mortalmenti pa 7 viaturas

Joven cabo-verdiano na Merka acuzadu di krime na morte di si midjor amigo

FOI ACIDENTE DI AUTOMOVEL ...
Dia domingo 8 di Novembro 3 hora y 10 di madrugada.
Local: Route 24 Norte pertu di saida 20 na cidade di Stoughton, pertu di Brockton.
Cena Triste: Un automovel, un Accura preto di ano 1999, dirapa prigozamenti y bati na vedason .... Unico passageru ki sta na carro, un joven di 21 ano, ê prujetadu pa meio di strada y atingidu mortalmenti pa 7 viaturas ki en alta velocidade sta circula na es freeway....
Ki sta conduziba automovel ê un joven di 20 anu. Embora sen ferimentos gravi ê sai di dentu carro disnortiadu, dizorientadu. ...Nitidamenti abaladu. Ta txora descontroladamenti... Ka era pa menus.

Ka era pa menus pamodi kel joven ki ê sta odja mortu na txon ê si amigo, si midjor amigo, un amizadi ki ben desdi tempu di mininice.

Vida di Fabio Tavares termina tragicamenti es dia domingo na route 24.
Danielson Tavares ki sta conduziba veiculo foi acuzadu es segunda-fera pa Tribunal Distrital di Stoughton di krime di homicidio automovel por konduson negligente y konduson sob efeito di alcool na es acidente ki tra vida di si midjor amigo.

Juiz decreta prizon di Danielson sob un fiança di 100 mil dolar ( cerca di 10 mil kontu CV) . Si eventualmenti ê ben paga es fiança ê podi spera julgamento en libertade mas pa kel li ê ten ki fica longi di lugares di bebida y entrega si passaporte.

Fabio ku Danielson, ki ta rizidi na Brockton, sta binha di cidade di New Bedford undi es bai vizita amigos. Sima kuazi tudo jovens di ses idade es gostaba di konvivi ku amigos, es gostaba també di obi muzika djuntu ( muzika di Cabo Verde y hip-hop merkanu) sen squeci di futebol.

Danielson sta vive na Merka dja ten ano y meio , foi si pai Osvaldo Tavares ki manda buscal pa dal un futuro midjor. Ê ta trabadja na kosntruson sen nunka squeci di si mai ki ê dexa na Cabo Verde, sempri ta mandal kel dinhero, kel ropa, kel kumida...

Danielson ta volta pa Tribunal na dia 8 di Dezembro.
Corpo di Fabio Tavares ta mandadu pa Cabo Verde mas sta previstu pa es sexta-fera un velório na Funerarias Multi Cultural, na Court Street na Brockton. fonte:ondakriolu