Pa alén di es es trabadju di “rasgata” jovens na rua ” Joey també ta kolabora na Brockton ku un scola alternativo pa studantes ki abandona ou ki expusadu di scola
JOEY GOMES KA KRE ODJA SI STORIA TA RIPITI NA BROCKTON...
Joey Gomes fla ma ê passa 17 ano, 8 mes y 1 hora na cadeia (kontadu na dedu) kondenadu por tentativa di homicidio y roubo di banco.
Na Norfolk State Prizon ê garanti ma ê dexa txeu jovens cabo-verdianos ki por un motivo ou otu entra na “gangs” y ki gosi sta spera pa ser deportados pa Cabo Verde : Jovens ki txiga Merka “sen nada” y ki dipos di kumpri 15 -20 ano di cadeia é obrigadu a volta pa Cabo Verde ...”sen nada”.
Ê pa tenta ivita es situason ki Joey ta passa grandi parti di si tempo na rua ta tenta tra jovens di mau kaminho, sobretudo kes jovens kriolus ki ta abandona ou ki ta expulsadu di Licéu y ki “sen nada pa fazi na vida” ta kába pa entra na vida di krimi y di dilinquencia. Alguns ta obi si konsedju ( kes ki ka ta obi y ta kontinua na “vida di thug” kuazi sempri ta termina na cadeia).
Mas pa alén di es es trabadju di “rasgata” jovens na rua ” Joey també ta kolabora na Brockton ku un scola alternativo pa studantes ki abandona ou ki expusadu di scola y como ses “mentor” ê ta incentivaz pa termina studu, pa ten un diploma y sobretudu ê sta xplicaz ma krimi ka ta kompensa .
MACACO TA SIGUI MACACO...
Pa Joey maior “tróba” di es jovens cabo-verdianos ki ta txiga Merka ê tentativa di “mercaniza”, ê kel desejo di imita merkanos ou kes jovens kriolus “ocidentalizadus” ki naci ou ki kria na Merka. Longi di ses terra y di ses kultura, es jovens “dizenraizadus” ( txeu sen kel apoio familiar) es “jovens ki ben” ta kába pa imita “macacos”.
ABANDONO ESCOLAR
Brockton e kel cidade undi proporcionalmenti ten + cabo-verdianos ta bai cadeia , cabo-verdianos di origen , di primera ou di segunda gerason (Joey fla ma kuazi tudu dia ê ta obi ta fladu ma un “bróda” dja fitchadu, maioria por tráfico di droga).
Pa Joey raiz di es prublema ê abandono escolar. Ora ki ê ta papia di abandono escolar ê ta papia també di kes adolescentes ki ta expulsadu di Liceu di Brockton txeu bes por “motivo menor” sima txiga atrazadu, fuma “padjinha”, etc.
Joey ta fla ma antis di expulsaba es Liceu devia primeru “conxi ses prublema”, odja modi ki es ta vivi, papia ku ses familia, etc ( Txeu jovens kriolus na Merka ta kumesa tradadja cedu, alguns ta sai di trabadju 5 hora di parmanhan pa bai entra scola 7 hora).
Di abandono escolar pa cadeia ê un pasu. Sen orientason y sen un “objetivo na vida” y txeu bes “marginalizadus” na sociedade, es joevns y adolescentes ta kába pa entra na kel circo infernal di dilinquencia ki invariavelmenti ta termina ku cadeia y tudu si consequencias. Ê pa ivita es situason, é tambe pa ivita ripitison di si própri stória ki Joey G. sta kombati. Al-ves ku sucesu, al-ves nau. Dizisti ê fla ma nunca ... fonte:ok
COMMENTS