França: CaboVerdiano vitima indiretu di Terrorismo...

Liandro fla ma ê odja morte, si vida entra nun espiral infernal ki ka ten data di kaba.

Paris/ Saint Dennis
CABO-VERDIANO VITIMA INDIRETU DI TERRORISMO…
Ti dia 18 di Novembro Liandro, na foto, ta lebaba un vida normal na Paris sima kuazi tudu imigrantes cabo-verdianos na França.
Ê ta trabadjaba pa paga si kontas y si renda di caza na bairro di Saint Dennis, na Norte di Paris, undi ê ta moraba y ê kontinua ta mora ku si familia.
A-partir di 18 di Novembro cuzas muda y vida di Liandro entra nun espiral infernal ki ka ten data di kaba. Na madrugada di es dia 18 ê kordadu brutalmenti pa un batalhon policial ki entra na prédio undi ê ta mora pa bai alveja un grupo di 3 suspeitos terroristas ki staba alojadu na caza di frenti ( un des e konsideradu cérebro di atentado di 13 di Setembro na Paris).

“Raide” dura 7 hora y meio, ku troka pizadu di tiros. Un mudjer uza bomba pa spludi si cabesa y un otu jiadista foi mortu. Alguns policias també fica feridu. Durante es tempo Liandro ku si familia sukundi baxu kolxon. Policias sta disparaba a-partir di apartamento situadu riba di sel y pa alén di barudju tetu sta amiasaba kai di un hora pa otu. Liandro fla ma ê odja morte ...

Mas pezadelu di Liandro ka termina ku es tiroteio.
Barudju di tiros kuazi xpludil timpano y desdi enton ê teni un zun-zun konstanti dentu cabesa ki ka ta permitil nen sequer trabadja pa sustenta si familia.
Si fidja di 7 ano tambe fica també traumatizada ku es tragedia y nen scola ê ka sta bai + . Un otu si fidja di 12 ano també sta passa dia na caza ta “ranha” paredi ku trauma psicologico. Pamodi ê ka sta trabadja Liandro tambe ka sabi modi ki e ta paga dividas ku konta ki kada dia sta aumenta.

Ê nes circunstancia ki mudjer di Liandro entrega un pedido di indemnizason a stadu francez. Pa alên di alojamento es kre un acompanhamento psicologico y fizico pa ses fidju. Es luta dja dura 7 mes mas sen ninhun rezultadu (nen sequer seguro inda ka pagal).

Prublema ê ki kel li é un cazu inedito na França di vitima indiretu di terrorismo.
Di facto juridicamente Liandro ku si familia ka podi ser konsideradu vitima de terrorismo pamodi distruison di si vida y di si apartamentu ê ka rezultadu di un ato terrorista, mas sin di intervenson di forsa policial. Nes cazu ê stadu francez ki debi ser responsabilizadu. Prucesu sta en kursu. fonte:ok