Gelson Martins, un “badiuzinhu” di 21 ano ki fazi tremi Bernabeu

Foi na jogo Real Madrid/Sporting, di primera jornada di fazi di grupos di Champions League.

Ê fazi tremi estádio Bernabeu y ao mesmu tempu ê enkanta milhons di apreciadores di futebol ki es kuarta-fera na televizon odjal ta “ridiculariza” jugadores di top mundial moda Marcelo, Kros, Casemiro ou Modric.

Embora reconhecidu na Portugal como excelenti extremo, pa Gelson Martins jogo di onti era si aprezentason na palco mundial justamenti nun kampu ki ê konsideradu katedral di futebol.... Y foi un entrada en grandi : Es kriolinhu di 21 ano foi un di kes midjor jugador en kampu na prezensa di alguns di kes midjor jugadoris di mundo. Ê foi sempri un punhal kravadu na kurason madrileno y ê dexa Marcelo ku “cabeça em agua”, Marcelo ki e un di kes midjor lateral esquerdo di mundo.

Di forma ki atuason di es joven cabo-verdiano nascidu na ilha di Santiago y jugador di Sporting di Portugal desdi 2014 sta mereci elogio unanime tantu di kriticos na jornal y televizon komu di amantes di futebol en geral ki na rede social fla ma es fika simplismenti “spantadu” ku es “meninu di oru” . ... Por izemplu na jornal “Marca”, un di kes jornal desportivo + prestigiadu di Europa, na jornal “Marca” bu podi lé ma Gelson Martins fazi un “partidazo” , un jogo kuazi perfeito, un pezadelo konstanti pa Varane, Sergio Ramos y principalmenti Marcelo ( Marcelo ki “celebra” ku alivio kuandu Gelson foi substituido na minuto 70).

Di tal forma ki atuason di es kriolinhu txoma atenson di “olheiros” di txeu clubes grandi di Europa y izibison di onti fazi aumenta en flexa si kotason na merkadu di transferencias. ..Pelo sin pelo nau direson di Sporting, dja na pensa na milhons, anuncia es kinta-fera ma Gelson Martins ka sta di benda ( pelo menus ate ki surgi un pruposta “irrecusável”)

Infelizmenti es izibison “glamuroza” di Gelson Martins ka foi rekompensadu pa un vitoria di Sporting na estádio Bernabeu. Na ultimos minutos Cristiano Ronaldo y Morata sela triunfu di equipa “merengui” (2-1). Mas ki + sta partilhadu na rede social êun jugada di Gelson Martins ki bu podi odja na video na kumentário. fonte:ok
Es jugada li ta rezumi izibison di Gelson Matins kontra giganti Real Madrid. Foi na minuto 54. Gelson apruveita di un mau passe di Marcelo pa skiva Toni Kros, pa engana Casimiro y pa dexa na txon Luka Modrik .Dipos e fazi un passe pa Bas Dost y na fin di lance kuazi e marka segundo golo di Sporting. Ki salva Real Madrid foi un korti pruvidencial di Dani Carvajal na ultimo mumentu.
comenta