USA: 2 Caboverdianos foi mortu a tiro na Dorchester...

Polisia di Boston sta investiga es cazu pa tenta diskubri autor ou autoris  di es krimi

Ê Jimmy Gomes,  41 anos di idade y pai di 8 fidjus,  y Amilton dos Santos, 27 anos di idade y pai di un kriansa di 2 ano.
Es 2 amigos  foi mortu a tiro pur volta  di 10 hora di noti di es kuarta-fera kuandu es sta circulaba djuntu dentu di un carro na  sidadi di  Dorchester, na area di Boston.  Carro ( un automovel  BMW )  carro  inda bai embati  nun otu  veiculo  y kába pa insendia (direito na foto).

Kuandu polisia ku bomberu txiga es 2 cabo-verdainos  dja staba mortu  ku ferimentos  di bala  ( testemunhas ta fla ma es obi pelo menus uns 10 tiro antis di carro embati).
Autor ou autoris di disparos inda ka foi prezu y polisia sta fla  ma foi possivelmenti  un ajuste di konta relasionadu ku guerra di gangues.

LUTO  NA KUMUNIDADI ..
Kenha ki   inda sta en stadu di  choque  ê Ramiro dos Santos ( pai di  Amilton). Ê staba detadu  na si kaza na Dorchester kuandu e konkodu  na si porta pa e dadu es tristi notisia. Ramiro perdi si mudjer poku tempu atraz… Gosi ê fla ma e fika el so.

Tantu Amilton komu Jimmy dos Santos ta viveba na Dorchester y di akordu ku amigos y familiares es ka ta buliba ninguén... Erica Benttencourt ( irmon di Jimmy) ta fla si mano era un rapaz dretu ki ta fazeba tudu pa si fidjus sima si tia Teresa da Graça tambe  ta konfirma .

Polisia di Boston sta investiga es cazu pa tenta diskubri autor ou autoris  di es krimi també es sta privini pa un possivel escalada di violensia jú ki sempri dipos di un krimi geralmenti ta surgi retaliason. Fonte:ok