Galiza na Spanha kré distingi es imigranti kabu-verdiana ku ses mais altu kondekorason
Non so di Paz, mas tambe di Amor, di Kultura y di Sodadi...
Apezar di si vida umildi Antonina Semedo, 64 anu di idadi, ê un di kes mudjer + ruspetadu na Galiza, na norti di Spanha, di tal forma ki un grupu di personalidadis di es region dja kria un kumison ta pidi Junta di Galiza pa kondekoral ku Medalha d’Oru di Galiza ( Medalha Castelao) ki ê maior kondekorason ki Junta di Galiza tud’anu ta atribui a un pesoa ki distaka pur méritu próprio na planu sosial ou kultural.... Es grupo ta konsidera ma Antonina dja dura ki sta meresi es prémio pa tudu si trabadju komu ativista sosial, komu mediadora inter-kultural, komu intérprete muzikal y komu mudjer emprendidora tantu na familia komu na kumunidadi .
Mas kenha ê es kriola di jéma ki “integra” na Galiza sen perdi si identidadi ?
Antonina Semedo Lopes de Barro ( ou Antonina de Cangas sima ê ta txomadu) ê un di kes primeru mudjer di rasa negru ki instala na parókia di Cangas, na Galiza, dja ten uns 40 ano ( Ê ta fla ma na prinsipio es ta kreba tokaba si pele rua pa odja si dedu ta fikaba pretu)
Sima txeu mudjer kabu-verdiana Antonina dexa Cabo Verde “tras”di si maridu (primeru Portugal y dipos Spanha).
Na prinsipio ka foi fasil... Si maridu era marinheru mas meses dipos di si xegada ê tevi un asidenti y Antonina ku un bebé na brasu tevi ki labanta pa djobi trabadju . Enkuantu ê ta labutaba nun restauranti tambe ê ta panhaba algas na mar pa kompleta renda di fin di mes...Dipos ê bai planta eucalipto y finalmenti ê konsigi kumpra un padasinhu di terra pa kultivu ...Foi di es forma Antonina “luta ku vida”, sempri na kel trabadju umildi di imigranti, na limpeza, na kampu, na kuida di duentis... Mas a-pezar di es vida duru Antonina nunka ka skesi di kanta pamodi ê ten na alma kel ritmu di Cabo Verde, ritmu di morna, di batuku, di funaná...
BATUKU TABANKA...
Pa Antonina batuku ku tabanka ê 2 palavras enkantadu, 2 voz ki ta sai di raiz sima planta rankadu di si txon mas ki ta trnasporta tudu kel sabedoria di tudu kes jerason ki kanta-l antis... Ê talves pur isu ki dja ten kant’anu Antonia djunta un grupo di mudjeris kabu-verdianas di sidadi di Burela pa kria “Batuku Tabanka”, un grupo ki dja dura ten stadu ta divulga kultura di Cabo Verde ( Odja video na kumentário)
Mas ê ka so atraves di batuku ki Antonina ta leba si mensajen di paz y di speransa... Através di un redi asosiativu ê ta trabadja pa djuda midjora vida di kabu-verdianos na Galiza, prinsipalmenti di kes jovens di 16/17 anu ki ta txiga Spanha sen kel apoio familiar y ki faxi-faxi podi kai na mau kaminhu .
Ê pa tudu kel li ( y pa mutu +) ki Antonina Semedo meresi un medalha d’oru. Non so di Spanha mas tambe di Cabo Verde. fonte:ok
COMMENTS