Nka kriadu ku txeu, nka kriadu ku midjor mas nkriadu dento ninhu de amor.
Nha zulmira fla man nanci pam mara cabé, pam odja sol trabeçadu cima kusa k mi é crucha ta smira arguem baxu pe de spinhu.
É flam tambi ma se nka tó kudadu nem noibu nka ta ranja pamodi nta vive dento casa di sinhá, k nlarga star de nha txambequinho ku nhas mocinhos, tras de busca sorte li cidade grande..
Idade dja kambam na corpo, nta chinte curba ta tremi tudo bez ke mandam ba panhal um lata d' agu pam subi podjal kol ra cabeça cima kusa k dimeu é praga.
Nta faci komida, se ka é sem sal é man poi sal alto. Se ka ku ceti é ku oleo txeu, se ka falta temperu é temperu txeu ke ta fla ma ta gurgunhal korpo...
Ah sinhá! Nbem de fora, nem tudo kusa nka sabeba ma era fruta. Djo li mi é fidjo de djom D'abedja, nkria na pé de mangui, ku simbrom ku tambarina...
Banana ku maçã la na nós casa era oru riba mesa. Ta txomada só óspri pa dada mas nu ta chintaba nós tudo na quintalinu ta spera pa ospri dá costa pa bá si caminho pa nu cata resto ke ka kumi, pa nu purba kel k fladu ma nu ka tem boca fino pa nu sprumenta.
Ko papiam de maquina! Nha, ka nha flam de máquina, mudjer.
La fora tudo mudjer dento si cá é maquina na tudo kusa k tem. Cima nós na ruma casa ka tem. Ochi é diá k missiu tranu foto na barri riba cutelo... cusa bonito de odja; se nha odjanu ta rabida cuzcuz nha ta pensa moças de mangui na po torno. Nha ta chinte ritmo mas nha ka ta acompanha compasso.
Ka nha papiam de comida finu. Midjo pa mi é pom nosso de cada diá, arroz é cumida festa...
Se nha odjam la nta dixiba fontom, nha ta fla ka mesmo arguem k nha teni dentul cá ta trabadja. Ami kusa finu ta fadigam. Casa fitxadu ta doencem.
Nha mi ngosta de sta largadu riba mundo, ngosta de fazi kusa lepité lepité sem fadiga mas bem feto.
Se nha kre sabi de nha storia nha sai de skritóri 2 minuto pam combersa ku nha:
Nha djobi li..
Fontom era nós sala de recebe visita. Nha ka sabi kuse ke fontom? Bom nha sabi und ke baia verde ka si?? Demo go pa tras de kes bons casas.. tem um cau ermo, ta parceu abandonado...
Nu ta djuntaba um cambadas de minis de cutelo, nu ta bá cataba azedinha. Pa riba nós nu tinha um ceu azul brilhante, na nós pe nu tinha terra massampé k cada passo k nu dá ta daba dentu pufa pufa...
Mi ku menis de nha Legunis nu ta binha cada um ku si lata rá cabé, nós comberso era kel um. Nós tudo nu ta imaginá mod k ta serba nós bida se um dia nu bira sinhá.
Ami nta ragalaba odjo na cabeça parke nka ta lembra diá k nha rangal purba cabu chinta massiu k ka ta dau gana labanta. Mi nconcheu so Pe de spidnhu ku kes cadera quato pe k ta podu na sala k mamai ti ochi ka dexam chinta pmd ta straga.
Nha Cesalta k ta daba pa concursadu, ta binha de Capital ta ba chinta nha avó ta avisal di pa diante pe ka prinda pé na cadera pa ka straga.
Vovo compra 4 cadera pa poi na sala na kel tempo k nha dono era guarda la Empa.
Kela é nós riqueza. Kela é nós furtuna, kela nós grandeza...
Ka nha ba dento inda não, nha sumara e nha pom um padaz de carne na nha prato li nu continua comberso.
Dexam pulba sal de bu monzada..
Ka bu injuriam mais k si. La fora ka tem tudo kes nobreça li mas ka nha pensa ma se nha purba kel ke de nós ma nha ta kre larga não. ..
ago cham flabu um kusa go, comida mamae oras k sai de panela, nu ta lembi ti ultimo caldo. Fica ta sabi ma na nós casa tudo goma sta na cocorota. Um diá nta corcoti, keloto diá é Djonzinho k ta corcoti...
Storia nha casa é sabi. Storia casa ta dabu briu de vive.
Nka kriadu ku txeu, nka kriadu ku midjor mas nkriadu dento ninhu de amor.
Agoh cham fla nha um kusa go: diá k nha conchi fora, nunca mas nha ka ta bem capital.
Dicla Gonçalves
COMMENTS