USA: Kabuverdiano sentensiadu a prizon perpétua pa morti di si fidju-femia...

Pamodi juiz konsidera ma el ê un prigu pa sosiedadi

É Jorge de Pina, 37 anu di idadi, tambe konxedu na kumunidadi pa “Manti Fixi”.

Jorge  ka aguenta lagua es kuarta-fera di parmanhan kuandu ê obi un juiz di Tribunal Superior di Providence   ta kondenal a prizon perpétua  komu  kastigu pa morti di si fidju-femia Aleida de Pina na sidadi di Pawtucket na  Julho di 2013.  Antis di lé sentensa juiz  txoma Jorge de Pina sádiku y abuzador, un pai ki tortura si fidju ti morri so pa mostra ma  ê podi ( Juiz fla  ma Jorge  ta xikotiaba  Aleida   ku fiu di luz ki kába pa perfura si intestino y finalmenti kauza si morti)

Ku ajuda di un intérprete Jorge de Pina ki papia  na kriolu fla ma ê ka sabia ma xikotada ta mata  y ma  si era pa Aleida morri era midjor ê morreba el ...Y + un bes  ê rekorda ma ê sta kriaba Aleida na Merka  sima si mai krial na Cabo Verde , si mai ki ê fla ma ta sotaba el txeu kuandu el era mininu ...Mas   nen stória d’infansia   nen txoru    di Jorge  ka imusiona juiz  ki fla ma   lagua  di Jorge   ê ka pa Aleida ...mas sin pa el propi Jorge de Pina .

Nu ta rekorda  ma Jorge de Pina foi julgadu  y  konsideradu kulpadu di  omisidio di segundu grau  na pasadu mes di Abril.  Juiz podia setensial  a un pena ki podia   bai di 10 anu di kadeia a prizon perpétua...Aparentimenti juiz konsidera ma Jorge de Pina ka ten riabilitason y ê opta pa pena másimu.

PS : Juiz  distaka tudu apoio ki Jorge de Pina resebi di si familia ( na  ses direitu) mas tambe ê lembra ma úniku ki podia papia y fazi justisa  pa Aleida  era el ) fonte:ok