França: Andreia Tavares, Caboverdiana ki encontra na poesia forma di liga ku si tera

Es caboverdiana dja tem txeu tempo ta vive fora di si terra natal, mas é kontinua ta skreve sobre el.

Andreia Tavares dexanu sabi um poku del, kontadu na primera pessoa...

"Mi e Andreia Tavares, di Rubon Manel, n studa na liceu Amilcar Cabral ti 11°.

N ben pa Europa na 2005, ntenha 18 anu. i des ki N staba na 8° anu dja N komesa skrebi versus ku puezia kes kusa di amor mas dja li fora ku siparason di familia, sodadi, difikuldadi di vida N  kontinua ta skrebi pasus di vida i ku maturidadi dja N odja kusas diferenti i nhas puezia dja panha otu forma.
 izenplu di titlu: o kau- berdi, txuba, mar, rotxa, muzika, indipendensia, amilcar cabral, 1 di junhu, nha bandera, 5 di juliu, distansia, afrika, pretu finu ku orguliu, pe finkadu na txon, bida di pueta etc etc, e txeu puezia.

Oxi N teni 31 anu, N ta vivi na França i senpri nha tera sta na nha korason i menti.
 n ta toka guitara tanbi, inda n sta na prendi, nsta na aula mas dja arguns mornas ku batuku nta toka.

Bida Di Pueta 

 E labanta ku ligria
Laba ku pureza
Kebra djudjun ku pas
Fla mantenha ku flisidadi

Sai ta kori tras di sonhu
Sakedu brasu abertu
Ta inspira nobidadi ki bai na bentu
Xintadu ta diskansa kontentesa

Bida sima pasarinhu
Ta kori mundu tras d'aventura
Korason lebi, rostu n'altura
Spritu kalmadu, odju fitxadu
Ta imajina beleza di nos morabeza
So abri odju ta spanta ku buniteza
Di nos tera kretxeu

Amizadi na lapizera ku papel
So inspirason ben el poi txapu
Na undi ki da
Mesmu na areia di mar ki ondia paga
Pueta ta armusa flisidadi, ta djanta amizadi

Pueta ten imajinason ku emuson na korason
Txoru di magua ku dor
Sufrimentu di nos kor
Sekura ku fomi sufrimentu di kaminhu pa tera lonji
Sodadi di kes ki bai ki ka ben

Pueta ta fla verdadi i ten orgudju di si identidadi
Ta kanta nos rikeza nos beleza tropikal
Nos txuba ku nos midju
Nos mar azul, nos padas di txon
Nos kultura ku tradison
Nos sol ku strela i lua xeia
Nos rotxa ku nos berdura
Nos 10, ilia na meiu di mar
Tudu skritor e pueta
Kada palavra e un puezia
Ami e un pueta ki erda nomi di
Eugénio Tavares, si Alma xinta-m riba di onbru
Norberto Tavares da-m ku mo na kabesa
Sara Tavares po-m melodia di gitara na obidu
Texeira de Sousa nina-m ku puezia
Inspirason toma konta di mi

Andreia Sofia Tavares De Sousa