Si namoradu na Merka flal pa ê spera ti ki stress passa
Situason ê kel li ( rezumidu )
“ Bon dia Onda Kriolu.
Mi ê kabu-verdiana mas un ta vivi na Merka undi dja ten kuazi un ano un konxi un rapaz di Fogo ki nu gosta txeu di kunpanhero. Mi komu dja n’ka sta kriansa djan teni 3 fidju grandi un flal logu na prinsipio ma un kré un ralasionamentu sério pa nu fazi vida djuntu pamodi mi un sta ben fazi 50 anu y el ê teni 45... Ê flan ma ka ten prublema y ma logu ki ê divorsia di mudjer ki ê kaza kol pa dukumentu ma ê ta kunpra un kaza pa nu vivi djuntu.
El ê un rapaz mutu sério ki ta brinka ku si trabadju y nunka nu ka passa djuntu nen un fin-de-semana nen na Valentines Day pamodi ê flan ma ê ta trabadja na Uber dia ku noti....Tambê komu ê ta mora na otu sidadi, undi ê flan ma ê ta dividi kuartu ku un amigo, al-ves ta passa semanas sen nu odja kunpanheru y komu ê flan ma ê ta sta sempri na trabadju nen na telefoni nu ka ta mutu papia ....Papia kol mais ê na chat.
Apizar di tudu es difikuldadi nos relasionamentu staba dretu tiransu alguns prublema pamodi el tambê ê un omi mutu siumentu ki ka ta kré nen pan bai un festa kumunidadi... N’ ka konxi ninhun si amigu y di si familia so un konxi so un irmana ki ê aprezentan... Si familia e flan ma sta tudu na Cabo Verde undi ê bai na mes di Abril pa ê bai djobi si mai ki e fla ma sta-ba duenti y mi ku tudu konsiderason ti kunpra un prezenti pa ê leba si mai.
Na Cabo Verde ê passa 2 semana mas nunka nu ka papia na telefone pamodi ê flan si telefone straga... So nu troka mensaji y mi un fika so ku vontadi di papia ku si mai.
Prublema go ê ki e volta di CV dja ten mais di un mes y ti inda nu ka odja kunpanheru... Diskulpa ki ê sta dan ê ki e ben di Cabo Verde stresadu ku duensa di si mai ma horas ki stresi passa ê ta djoben.
Tamben ê pidin pa nunka pa n’ ka ligal diretamenti pa si telefoni pamodi ê ka teni kabesa pa konbersu gosi ki tudu es prucesu di divórsio tenel ku kabesa na depreson.... Un dia un ligal ê xatia ta flan ma hora ki ê kre pa nu papia ma ê el ki ta ligan...Nu papia so un bes mas na telefoni di un si amigo pamodi e flan ma si telegoni inda sta stragadu.
Tudu kel li sta dexan ku duvida e semana pasadu na papia ku un amiga e flam pan abri odju pamodi es nha boyfriend ka po na si facebook nen un fotu di es si feria na Cabo Verde. mas un fla es nha amiga ma el ê ka mutu di poi foto na facebook ...
Ago djan fika sen sabi kuzê ki n’ta fazi y embora un ta amal txeu djan kumesa kansa ku es situason.
Nha vontadi ê munta karru bai djobel la si kaza pan dal kel forsa nes mumntu difisil mas ê flan é ma nes mumentu ê ka kré papia ku ninguen y ma si n’bai djobel ma nu ta dána pan spera ma ê el ki ta ben djoben.
Di forma ki un sta pergunta ti kuandu ê ki un debi speral...Ti ki stress ku depreson passa? Y si ka passa?
Muito abrigada desdi já. fonte:ok
COMMENTS