USA: Kabu-verdiano baliadu na Brockton fla ma Jimmy Pereira salval si vida

Jimmy fla ma ê ka podia dexa di sokorri algen ki é konxeba

Merka

Jimmy Pereira (direito na foto) ê kel joven kriolu ki kuazi dja ganhaba eleison pa Mayor di Brockton na pasadu mes di Novembro...

Kinta-fera 5 di Julho, pur volta di 2 y meia di madrugada, Jimmy Pereira fla ma ê odja Jair Barros ( esquerdo na foto) feridu na txon y ma ê rekonhesel komu neto di un sinhora ki ta tomaba konta d’el kuandu el era minino.

Jair Barros, di 35 anu, tinha ferimentu di bala na bariga y si rostu staba kubertu di sangi rezultanti di un tiro ki raspal bexu.... Jimmy fla ma ê ka pensa 2 bes: Ê karrega Jair na ombru y ê pol dentu di si karru y ê lebal pa un hospital di Brockton di undi dipos Jair lebadu di helikóptero pa Boston Medical Center, na sidadi di Boston.

Jair sta rekupera dretu na ospital y es segunda-fera ê resebi vizita di Jimmy Pereira undi ê apruveita aportunidadi pa agradesi es joven kriolu di 27 anu ki ê fla ma salval si vida pa ê podi kria si 2 fidju-fémia...

Jimmy pa si ladu fla ma ê ka podia dexa di sokorri algen ki é konxeba ( mas ê fla ma ê ta fazeba el pa kualker otu ser umanu ) kuandu na altura ningen + ka prontifika pa djuda ( era un madrugada movimentadu na Brockton dipos di fogos di artificio di 4 di Julho).
Jimmy inda fla ma ê ka obi tiro nen e ka odja kenha ki dispara.

Policia di Brocton sta investiga kazu mas inda kunetadu ku es tiroteio ningén ka prendedu. fonte:ok