Txuba... Bo e pitroli, rikeza Kau Berdi

Ora ki bu kai na nos tera, Tudu argen kontenti, Djatu pa tudu kutelu

Txuba
Oh txuba  nha amigu
Ben pa nha tera di sodadi
Ben rega nos simentera ku bu lagua
Ben obi melodia di nos nxada
Na  kantiga di  nos kanpunes
Oh txuba di speransa
Rikeza nha eransa
Dexa-m goza nos nkontru
Pa N guarda lenbransa di bu mantenha

Txuba, lagua ki Dios manda di seu
Bo e pitroli, rikeza Kau Berdi
Ora ki bu kai na nos tera
Tudu argen kontenti
Djatu pa tudu kutelu
Ses dizeju e di tene-u pa tudu tenpu

Amigu pasajeru
So nu obi strubada na seu
Alanpra na janela
Tudu argen ta sumara bu txigada
Nos petu ta spludi di ligria
Rostu pa seu ta djobe-u
Pa ben toma nobidadi ki bu traze-nu

Mas ora ki bu da rinkada pa bu bai
Ki arku dabedja parsi na orizonti
Na poku dexa mantenha pa bus fidju
P’es simia simenti bu amor
Ku forsa i koraju di trabadjadoris
Txuba vizinhu di seu ku nebua
Sigi kaminhu Kau Berdi,
Ben faxi N ben da-u kel beju ki bu meresi.

Andreia Tavares de Sousa