Ê ingana si kunpanheru ku maridu di si “patroa” y gosi ê sta grávida di 4 mes

Deisy Kré Un Orientason...

Pamodi sima ê sta fla ê sta dizisperada dizorientada sen sabi kuzé ta fazi:
“ Bo noiti Onda Kriolu n’ten 26 anu y dja ten uns 3 anu ki mi ku nha kunpanheru nu ka vivi djuntu dentu dun kaza ku nos fidju-fémia ki ten 2 anu. ..Nha kumpanheru ta trabadja na Praia y mi n’ta trabadja na kaza di un kazal portugues ki ten 2 fidju pikinoti y ki un podi fla ma ta trata empregada mutu dretu ...

Un belu dia maridu di nha patroa txiga kaza mais sedu di trabadju y konbersu ta bai bonbersu ta ben pinta kel klima y nu kába ta fazi amor kuza ki fika ta kontisi sempri ki patroa sai di káza. Nunka nu ka uza kamizinha y na fin di mes nha mestuason ka ben y un diskubri logu ma n’staba grávida.

Un ten serteza ma pai di es nha fidju ki n’teni na barriga ê es portugues, mas komu ê odjan grávida ê flan nada mi també un ka flal nada enkuantu nha kunpanheru sta kontenti feliz da vida ta fla tud’algen man ma sta ben dal un fidju-matxu ki ê ta ben poi nomi Cristiano Ronaldo pamodi el ê fan di futubol.

Un sta li nun dilema grandi sen sabi kuzé ki n’ta fazi gosi ki djan sta gravida di 4 mes .

.. Será ki ê pan kontinua ta ingana nha kunpanheru ma fidju ê di sel ? Y si mininu ben nasi branku kabelu finu sima portugues?

...Ou será ki n’debi dizengana nha kumpanheru mesmu sabendu ma nunka ê ka ta purduan pamodi un konxi si manera di ser, fora di tudu kel burgonha ki n’ta ben pása djuntu di familia ku amigos?

Ou será inda ki n’debi konta es portugues ma fidju ê di sel pan odja si ê ta asumi kumo pai?

Nhos djudan ku algun orientason pamodi un sta nun situason di duzusperu ta deta noti ka ta durmi pamodi un sabi ma un ka fazi dretu ku nha kunpanheru ki gosta txeu di mi y si rapendimentu ta mataba nhos podi ten serteza ma un staba mortu. fonte:ok