Lux: Kabu-verdiana kondenada a 5 anu di pena suspensu pomodi ê tenta poi lumi na kaza di si ex-kunpanheru

Kabu-verdiana kondenada a 5 anu di pena suspensu pomodi ê tenta poi lumi na kaza di si ex-kunpanheru

Chan staba grávida di 8 mes kuandu na dia 12 di Janeru di 2012 ê sai di si kaza na sidadi di Schifflange na Luxemburgo pur volta di 8 y meia di noti y dipos di kumpra un litru y meio di gazulina nun postu di kombustível ê toma autokarru y ê bai ti kaza di Pedro si ex-kumpanheru ki sta durmiba ku Beta ... Ku ajuda di un skada Chan subi ti varanda di kaza di Pedro ki era nun segundu andar y dipos di froxa janela ê lansa gazulina y ê sendi inskeru... Lumi kumesa ta spadja ma felismenti Beta da konta y ê korda Pedro ki fadigadu fadigadu konsigi paga lumi ku alguns bald d’agu . ..Pedro inda konsigi odja Chan através di Janela. Espesialistas na inséndio ben fla na Tribunal ma si Pedro ka agida ku rapidez ta tinha un tragédia.

CHAN KU BETA STABA GRÁVIDA DI MESMU OMI..
Es omi ê Pedro, un kabu-verdianu ki bai ku Chan pa Luxemburgo na 2011 mas ki algun tempu dipos ben “troka” Chan pa Beta, un otu kriola ki na altura di okurénsia també staba grávida... Chan ka konforta ku desizon di Pedro ki ê ta konsidera traison y enton ê disidi vinga, so ki felismenti si vingansa ka da obra y na altura Chan foi prezu preventivamenti y ê pasa 2 mes na kadeia di Schrassig undi si fidju també nasi.

Desdi enton e fika sob sob kontrolu judisiaria ti si julgamentu ki foi es tersa-fera na tribunal di Schifflange... Dipos di konsidera tudu sirkunstansias atenuantes komu faktu di Chan staba grávida ku “kabesa dizorientadu” dipos di abandonada pa si kunpanharu, dipos di analiza si kazu Tribunal disidi na aplikal 5 anu di kadeia ku pena suspensu . Chan ki gosi teni 44 anu d’idadi ka podi kumeti ninhun infrason duranti es peridu di tenpu sob pena di mandadu pa kadeia.

Chan ta fla ma foi un atu inpensadu di si parti y ê ta justifika ku siumi y amor ki ê tinha pa Pedro.
Pedro ta fla ma nau .. ma foi so “despeito”.
Kual ê bu opinion?
( PS : Nomi di “personagens” foi alteradu pamodi es kré anonimatu) fonte:Onda Kriolu