"CORONAVÍRUS, cada dia bu sta dá cabo di mas alguém"

Bu bem di rapenti, e ka sabêdu pa kanto tempo...

Texto enviado por  João Fortes...

 CORONAVÍRUS

CORONAVÍRUS, bu surgi lá longi - ka sabêdu dundi bu bem; txéu sa tá fazêdu pá konxêu, mas poku sabedu sobri bô; abô ê nobu, mas bu ka manso - bu nomi ta pui médu, bu strago ê txéu...

CORONAVÍRUS, bu ta spádja faxi dimás - bu sai di undi bu surgi, bu toma mundo, bu viagi ê silencioso e di rapenti, bu ka ta skôdji distinu, bu ka ta skôdji vítimas, bu ka ta paga passagi, ma bu ta tormenta kenha ki ta karagou; na bu viagi ku bu dizimbarki, alou tá spadja manenti - dja bu konxi 4 kontinenti, ma bu ka konxi tormento di bu milhares di vítimas - bu ka konxi aflisôn ki sta pa tudo nasôns...

CORONAVÍRUS, abô ê pikinoti - ma bu nómi ê grandi; mundo tênêu na boca, pamódi bu nôbidadi stá spadja medo; cada dia um nóba di bô - cada dia bu sta na um kou, cada dia bu sta dá cabo di mas alguém, cada dia bu sta toma conta mundo...

CORONAVÍRUS, mundo stá ta pára pamodi bô, nasôns sta tá izula pamodi bo, cidadis sta fika dizertu pamodi bô, alguém stá tranka dentu casa pamódi bô, humanidadi sta preocupado ku bô - bu bem di rapenti, bu sá tá ataca manenti, bu viagi ê imprevisível e sem distino certo. Bu bem di rapenti, e ka sabêdu pa kanto tempo...

CORONAVÍRUS, bu teni um luta kostanti - ma enquanto bu ka konxêdu, ninguém ka sta pára di luta kontra bo; bu surgi lá logi, ma bu sína sá tá fazêu txiga tudu kóu - pa mas nu kóri, pá mas distanti ki nu staba, bu stá parci kada bês mas perto nôs...

Djá fládo pá mundo pripara pa bô - ma modi ki nu tá pripara pa bô, si bu ka konxêdu?
Modi ki nu tá pripara pa bô, si pa bô, inda ka teni ramêdi? Modi ki nu tá pripara pa bô, si nu ka teni kondisôn? Nhôrdêz, nhu tem piedadi di nôs!

CORONAVÍRUS, pá mas bu tormenta nasôns, pa mas bu provoca pânico ku medo, em brevi, bu ta tem solusôn!!!