Amor é kel sentimentu kapaz di salvanu

Nos é talvez uniku responsavel pa u ki ta kontisi na nos vida

Tem kenha ki sta perdidu y pa xinte forte é tem ki deseja alguem mal, Es ta tenta da ku bo na txom, es podi ate suri pa bo, mas ses alma ka bom

Inserteza

Vida ki nu ta leba hoje, tudu mundu sem sabi kuze ki ta ser manham. Planus ki nu faze pa es anu? Maioria ka ta odja luz di sol. Mundu sa passa pa momentus di inserteza y nos tudu é vitima, ou kulpadu?

Mi nka di fazi planus longos, sempre nvive naturlmente, sem txeu espetativa y sem abisuluta serteza na nada. Apezar di tudu, esperansa sempre fortalesi nha existensia, y é es esperansa ki tenem li, ta akredita ma dias melhoras sta pa bem, ma nos é kapaz di vensi dezafios y obstakulus ki vida ta poi nos frente pa testa nos forsa.

Uns ta prokura resposta na Deus, y ta poi tudu na si mo, y talvez grasa a es fé tudu ta da sertu, pamodi universo é maior y Deus é amor. Amor é kel sentimentu kapaz di salvanu, di tranu di fundu di possu. Onti na fala ku um jovem, na tenta konvensel pa larga bebida di alcool, é flam ma problema ka sta na bebida, ma sta na si menti. Ndal si razon.

Nos é talvez uniku responsavel pa u ki ta kontisi na nos vida, y mudansa sta dentu nos. Universo é um spedju, kal ki nu da ki nu ta resebi, ka adianta vive negatividade, Mudansa é quase sempre bom, alves é fundamental pa nu avansa

Anilton Levy