"Pamodi ki Salario di kenha ki Necessita ser Subidu ka ta subido"

"Nta kria pa Salário di um politico serba mesmo valor ki Salário Mínimo"

Opinion di Anilton Levy, ke publica na si perfil di facebook...

"Politica é algu interessante, pena ki txeu pessoas sta na politica sem ser politico. txeu ta pensa me um profisson.

Maioria oras ki sta na opozison es tem um enorme sensibilidade pa questons social, mas oras ki entra na situason es ta skece di objetivo inicial, talves pamodi sufa é mais confortadu, ar condicionadu é mais fresku, es ta skece di kel jovem kes da mozada baxu di lumi sol y kes promete ma oras kes txiga la ma es ta resolvi si problema. Es ta skece ma kel mudjer kes abraça y fla "Dona ka nha preucupa so nu ganha nu ta midjora kondison di nha", inda sta na mesmu sufoku, sem trabadju y ku fidju na skola sem sabi modi ta paga propina.

Nka sabi modi ki bu ta konsigui durme, dipos di da bom farto y bu gasta mais di 100 contu na jantar ku bu ekipa ki tem ses salario mas es ka tra num tuston pa paga um xingua, inda bu ta uzufrui di ajuda di custu y bu sabi ma ku salario ku ta recebi podia pagaba 10 alguem mas mesmu assim di bo ki sa ta subi sempre, sabendu ma tem pessoas ki ta durme sem janta y sem esperança ma oras ki sol bem ta parsi um pom pa toma café, y es teni esperança na bo, pamodi bu fla ma bo ke soluson. Kes ki ta recebi salario minimo, ta vive ta debi pa loja vizinho pamodi preço produtos sa ta subi tudu mes, mas si salario kontinua kel mé.

Nka kre disvaloriza valor di nenhum pessoas ki ta assumi cargos na politica, mas talves é mais inteligente y mais benefico pa povo si bu panha salario y despeza na regalias di metadi des bu devidi pa povo, undi bu ta emprega centenas di pessoas y garante kumida na mesa di txeu familia.

Tem txeu kuza kin ka ta intendi. Na nha opinion, preço das coisas devia ser di acordo ku Salário Mínimo di kada país. Por exemplo: Bu ka podia tem um salário mínimo di X, y preço di mensalidade de universidade ser maior ki salário mínimo.

Agoh, nta kria pa Salario di um politico serba mesmo valor ki Salario mínimo di kel país."