Foi txeu barrera y txeu dificuldadi ti dias d oji, mas inda nsta li na luta sem disanima nen perdi fé
Bem konxi storia di Telma, contadu na primera pessoas...
Nha nomi é Telma, nomi artistico "Telma B"
Nha envolvimento ku musica foi desdi muitu cedo, desdi nha infância ngosta d kanta...
Antis nka tinha num interessi nen paixão pa rap, somenti pa musicas tradicionais y otus stilos variados, nka tinha um stilo specifico, apenas nta skreveba y kantaba só pa mi, nunca ntxiga d partilha nha paixão p musica ku otus pessoas pamodi timidez oh talvez medo d ka ser aceitadu...
Mas ku tempo nbata kria interessi pa rap, na altura ntinha 13 anos , y la tambe nta só skreveba nhas poesia, y kada bez mas nfika mas apaixonada, y nha paixão kontinua ta kria ku alguns influências, sima rappers d nha guetto (Havaiana y Rappers Críticos) nta kurtiba obiba es y era único influência diretu k ntinha.....
Dipos ku 15 anos nkonxi uns maltas d mesmu guetto k mi tmabe es ta kurtiba kantaba rap d la nu komesa ta aprisenta kumpanhero ideias y foi lá k n ganha mural pamodi es kurti nhas lyrics y n ganha koragen pan partilha nha love p musica ku mas alguén.
Nton mas pessoas passa ta sabi y di la txiga na obidu d um produtor d nha zona k konvidan pan bai grava na se studio pamodi me obi ma nta kurti rap y na altura ka tinha num mudjer k ta kantaba rap na Cabo Verde y era raro mesmo y ntinha komo distaca...
Mas na inicio nha familia ka kria pan kantaba pamodi ma nta disfoka d skola y ma ka ta daba certo fazi kel 2 kuzas la, y ma era só studa k era nha prioridade, nton foi txeu dificil ka ten apoio d familia, excepto nha tio k ta djudaba mi txeu mesmo k hoje infelizmenti ka ta podi sisti nha progresson😢.
Y kela na momento foi maior dificuldade pamodi ntinha k fazeba tudu pa kosta sem konsentimentu d nha familia, mas kela ka fazen disisti, n trasnforma kes momentos difícil nha primero música intitulado como será k nta konsigui.
Nton dipos d txeu insistência d kel produtor pan bai grava nkaba pan risolvi bai toma beat pan bai grava, tudo as escondidas, só k nkaba pa grava kel dia mé pamodi medo d kel produtor d nka volta mas pa studio pamodi eh sabia d nha situason eh insisti pan grava kelora.
Eh fla "skodji un beat bu insaia gossi nu tenta fazel pmd ja k djo bem nu aproveita" nton ntevi k improvisa, npanha un letra k ta fala d situason k nsa infrentaba y n graval...
Nta konfessa ma kel nha primero musica supera tudo nhas expectativas, tanto mi komo otus pessoas (foi na Dezembro de 2013) data marcante pa mi...
Foi un passo dado y un sonho realizado.
Apartir d la es komesa ta konvidan pa txeu featuring y txeu show...
Mas també muntis menti atrasados k ta odjaba rap komu mau influência y musica d "thug, bandido y drogados" es passa ta pontan dedo na rúa, na altura na ano 2013 ka tinha kel mesmo aceitason d rap na Cabo Verde k oji em dia nton ka foi fácil, mas pa un amanti nato kela eh ka era motivo d disisti, mas sim persisti!
Mi nka tinha apoio y kondisons financeira pa sustenta nha sonho k era invistiba memu asério na musica y nunca ntevi un patrocínio, y alimenta sonho só ku perspectiva y desejo eh ka fácil... Nkontinua ta sunha alto mas só sonho ka foi suficiente, es discriminan txeu bez pmd nta kanta rap, mas nka disisti mesmo assim, n sufri bulling na skola pamodi nha prissor ta konsidera ser homi d kultura y eh ta atxa ma rap bem pa straga nós kultura, y ma mi nsa kontribui p decadência d nós kultura y nfoi motivo d txeu piadas d kela pa nhas kolegas...
Nha familia dipos d txeu rejeison es kaba pa aceita pmd es odja mes ka podi fazi nada peranti nha sonho, es passa ta incintivan dipos kes komesa obi nhas musicas y alguns bons feedback...
Nfoi humilhado, nfoi rejeitado, es ka kria aceita pmd mi eh mudjer pmd ma ku rap npodi torna na un drogada, thug y entri otus, pa otu lado nfoi incentivado, apoiadu y parabenizado pan ser um lutadora y korri traz d nha sonho independentimenti ses ta aprova oh nou...
Foi txeu barrera y txeu dificuldadi ti dias d oji, mas inda nsta li na luta sem disanima nen perdi fé, ku sperança ma nta txiga la
"DIPÓS DI TUDO NSTA DI PÉ
DIPÓS DI TUDO NKA PERFI NHA FÉ
É KA FÁCIL MAS MAS MI NTA KONSIGUI
NKA PERDI SPERANÇA DI UN DIA VENCI"
keli eh refron d nha mas novo trabadjo, y un resumo d nha stória d luta
Nten sperança ma nta txiga la un dia y ganha nha valor, rispetu y rekonhecimento na Rap, pmd kela pa mi eh un sonho d longa data.
COMMENTS