"Un Mes Di Ses Saláriu, Koitadu Ta Nganha-l Na 3 Anu"

Un koitadu ta nganha 14 kontu pa mes, ten menbrus di Partidus ki ta nganha 510 kontu pa mes

Nu ta partilha li textu di Armindo Martins Tavares, nhos dexa nhos opinion na comentario

UN MES DI SES SALÁRIU, KOITADU TA NGANHA-L NA 3 ANU

Oxi N sa ta obiba un seson di nos Parlamentu, N fika un koxi tristi kantu N obi un diputadu ta papia, ta subi onbru bazofu, ta fla ma governu dja da 1.000$00 di omentu pa kes ki ta trabadja di Sugunda te Sabru, alguns ate, di Sugunda pa Sugunda. E fla ma gosi, es ta ben pasa ta nganha 15 kontu pa mes enves di 14, pamodi ma  es ta governa deresionadu pa kes ki e más nesesitadu. 

Nha genti! Korpu ñurñunha-m, peli rapia-m, odju badja-m, kabelu labanta-m na kabésa, língua trabesa-m na bóka. N ka akredita na kusa ki e fla. I kaba e fla-l ku rostu kran, mesmu di kenha ki ka sabe kusê ki e burgónha na kara. 

Komu ami N fase kuarta klasi na kel bes, N ka nen buska mákina kakuladora pa N fase kónta.  N pega apénas na un padás di papel ku un pónta lápis, N fase kónta, N fika ta sabe ma más nesesitadu di Kabu Verdi e kes ki ta briga pa Partidus. 

Na nha konta da ma dinheru ki gentis di Partidu ta nganha na un mes, e más txeu di ki kel ki un koitadu ta nganha na 3 anu, sen da falta nen fase grevi. Moooo, ka sabi!!! Purisu ki N ka ta mete na Partidu, pamodi ami N ka koitadu.

Un koitadu ta nganha 14 kontu pa mes, ten menbrus di Partidus ki ta nganha 510 kontu pa mes, alguns ate, mutu más. 

Palmareju, Meu Super, 3 di otubru di 2023

Armindo Martins Tavares