Si tudu korri konformi ses expetativa dili 4 ano escudo cabo-verdiano ta sai di circulason.
MOEDA UNICA NA ESPASU CEDEAO PREVISTU PA 2020...
Si tudu korri konformi expetativa di dirigentes di CEDEAO ( Comunidade Económica dos Estados da África Ocidental) – Si tudu korri konformi ses expetativa dili 4 ano escudo cabo-verdiano ta sai di circulason. Ê ta ser substituido pa ECO, un moeda unico ki ta ben circula na tudu 15 paizes di CEDEAO.
Decizon foi aprovadu nun reunion di Conselho de Mininitros des futura Zona Monetaria Oeste-Africana ( ZMAO). Mas antis di lansamentu di es moeda unica sta previsto kriason di un Banco Central Oeste-Africano y inplementason di un série di prugramas di convergencia economica pa tudu paizes di zona.
Na verdade es ideia di renuncia a “nos escudo” ka ta agrada a tudu cabo-verdianos, di acordu ku kumentarios di internautas nun noticia di OK publicadu anu passadu sobre es mesmu assunto.
Escudo cabo-verdiano sta indexadu a EURO, y txeu cabo-verdianos ka kré odja si dinhero ta perdi vantagens di es ligason ku moeda europeia ( ki tambe sta passa pa un periodo konturbadu 15 ano dipos di si kriason) .
Dipos ten kel prublema di asimetrias economicos y social ( por exemplo orçamento di Nigeria ê uns 40 bes + elevadu ki orçamento di CV).
ENTRE FANTASMAS Y REALIDADE...
Es prujetu di moeda unica pa CEDEAO ê ka di hoje.
Era pa ê ser implementadu na 2009, dipos ê foi adiadu pa 2015 y finalmenti e finalmenti foi fixadu un novo data . Embora ê sta torna kada dia + “precizu”, pa andamento di karrosa dificilmente es prazu di 4 ano ta ser ruspetadu ( Di facto inda sta falta txeu pa fazi pa atingi kes rikizitus minimos pa implementason di un zona monetária di sucesso).
Di kualquuer forma es moeda unica seria un instrumentu importante na katalizason di desenvolvimento di paizes di CEDEAO, un espasu kumunitario ki ê sen duvida un exemplo di unidade y integrason na Africa.
Importante ê aborda es assunto ku kabesa y non ku kurason y foca na abordagen económica di forma a kostrui serenamenti un zona monetária baziadu na alicerces solidos y seguros.
PASSAPORTE AFRICANO PA VIP...
Enkuantu na CEDEAO cidadons ta circula livrimenti sen necessidade di visto na passaporte ( Livre Circulason de Pessoas ê tambe un “ganho” di es organizason regional)- Enkuantu na CEDEAO cidadons ta circula sen prublema Uniȃo Africana sta pensa na lansa un Passaporte Unico pa Continente Africano. Para já es passaporte so ta ben beneficia Chefes de Estado, Chefes de Governo y Ministros de Negócios Estrangeiros. Africanos “normal” inda ten ki spera. fonte:ok
COMMENTS