USA: Es kriola sa viajaba pa Cabo Verde ku mais 6 membros di si familia, é discubre més foi burlado

"Kasubody internacional" - é si ki edlene ta txoma es acontecimento

Empregada di Agénsia di Viagem na Praia akuzada di falkatrua

Edlene Varela (na foto), kabu-verdiana rezidenti na Merka, ta fla ma ê tinha kabelu tudu kompodu , unha tudu pintadu , maleta tudu fitxadu ta spera pa viaja pa Cabo Verde djuntu ku 6 membros di si familia kuandu ê da konta ma a-final ninhun d’es ka tinha pasaji ki es kumpra através di Neima Dias, empregada di Satguru Travel & Tour Service ku sede na Palmarejo, sidadi di Praia...

Pa alén di Edlene ten txeu otus kabu-verdianas rezidenti na Merka ki manda mensagen pa Onda Kriolu ta denúnsia es sinhora pur fraudi y falkatrua pamodi dinheru ki es mandal pa pasaji ê uzal pa si fin pesoal ( Es ta fla ma uns 20 pesoas kai nes golpi ki ta envolvi milharis di dolar). Agensia Satguru Travel dja tra ses kabesa di ladu ta fla ma es ‘tranzason” foi fetu nun bazi privadu ( sen envolvimentu di agénsia). Lezadas sima Edlene kré devoluson di dinheru ki alguns manda NEIMA através di West Union ( ku foto di fatura y troka di mensagens pa konfirma , sima també ten komprovativos di rezerva ). Objetivu di denunsia es fla ê ma ivita ki otus kabu-verdianos ki ta tradadja duru na stranjeru kai kontu di es “golpista”. fonte:ok, Edlene Varela