24.240 kabu-verdianos ta sufri di depreson

Undi ki sta nos alegria?

24.240 KABU-VERDIANOS TA SUFRI DI DEPRESON ...
Kes li ê kazus ki diagnostikadu pamodi maioria di kabu-verdianos ki ten sintoma di depreson ta sufri kaladu sen bai dotor .

Di akordu ku un estudo di Organizason Mundial di Saude OMS, 4.9% di kauverdianus ta sufri di depreson, un persentagen ki ta koloka Cabo Verde na segundu lugar di lista di paizes + depresivu d’Afrika enpatadu ku Tunizia ( Primeru ê Djibuti undi 5.1% di si povu ta sufri di es prublema mental)

Kataloga Kauverdianu komu segundu povu + depresivu d’Afrika ka ta dexa di surprendi, kauverdianu ki senpri foi konxedu komu un povu alegri, sorridenti y ben dispostu.
Kuzé ki sta mergunhanu na sufrimentu?
Kuzé ki sta pruvokanu tudu es tristeza?
Kuzé kuzé ki sta matanu tudu speransa?
Kuzé ki sta tranu sonu, sta tranu apititi, sta tranu tudu prazer di vivi ?
Kuzé ki sta diskonsentranu, ki sta dizorientanu, ki sta kansanu kabésa ku mau pensamentu?

Depreson ê un duensa mental ki txeu bes ta ten un final trájiku na Cabo Verde .
Maioria di jovens ki ta suisida ê pamodi es transtornu mental ki infilismenti na maioria das vezis ka ta tratadu , ka ta diagnostikadu ou nen siker ka ta setadu...

Ê klaru ki kuidados di duensa mental sta salvaguardadu na Política Nacional de Saúde, mas també ê klaru ki si tratamentu na Cabo Verde ta dexa “muito a desejar” (ê manifestamenti insfesienti y inadekuadu sima propi prufesionais di saude ta rekonhesi)

Mas pa alén di midjora forma di prevenson y di tratamentu di es duensa ki txeu bes nen siker ka ta rekonhesidu komu duensa, pa alen di sensibiliza sosiedadi sobri es prublema ki txeu bes ta enluta familia, pa alen di tudu kel li pa nu konbatel nu ken si sabi kuzé ki sta na raiz di es prublema...

Kuzé ki sta tranu prazer di vivi?
Kuze ki sta mergunhanu na duzusperu ? fonte:ok