Dexa-m purba-bu

inton go N kre fla-bu, dexa-m obi bu boka na di meu koladu

N le naturesa bu odju
N ka atxa num sinal di lagua
nun pitada inveja
Nen txaskam di maldadi

N sumura nha obidu
na pan pan di bu korason
N ka sakuta num rankon
Nen salbaxaria
ki mafari malkriadesa

inton go N kre  fla-bu
dexa-m obi bu boka
na di meu koladu
pa nu papia tudu djuntu
pa N sabi si bu denti ta mordi.

si bu lingua ta purba sal
si bu naris ta xinti-m di lonji
si bu odju e mansu me
si bu koxa e rodondu me

si bu ta papia na konpasu
bu ta anda nota.
E bo N ka sabi modi ta fla-bu mas.

Danilson Pires